BO NADAL E PREMIADAS CONCURSO MARCAPÁXINAS

Rematamos este primeiro trimestre e despedímonos desde a biblioteca, ata á volta do Nadal, entregando os diplomas e agasallos as catro alumnas premiadas no Certame de deseño de marcapáxinas. 

BOAS FESTAS A TOD@S!!!

 

RECOMENDACIÓNS DE NADAL

 Nestas datas, queremos deixarvos as nosas suxestións de Nadal. Para esta ocasión, escollimos escritores/as ou acontecementos que este ano están de celebración. 

Esperamos que  vos guste e vos desexamos un bo descanso e moi felices Festas!

                                                                           PREME NA IMAXE

CONCURSO DESEÑO MARCAPÁXINAS

Por fin, xa temos o resultado do Concurso de  Deseño de marcapáxinas. Aquí vos amosamos os catro traballos que acadaron máis votos. 

Parabéns para tod@s  @s que participáchedes e en especial as catro rapazas premiadas, e lembrade que temos expostos na biblioteca todos os traballos presentados ao certame.

 

BOLBORETAS POLO 25N

Neste día contra a violencia de xénero queremos facer a nosa particular homenaxe a todas as vítimas acaecidas no que vai de ano e, para isto, o noso voluntariado elaborou unha bolboreta en lembranza por cada unha delas. 

 

CENTENARIO DE MARÍA CASARES

 Este luns 21 de novembro cumpríronse cen anos do nacemento 

desta recoñecida actriz galega que triunfou  en Francia.

Para revindicar a súa figura dende a biblioteca presentámosvos este cartel:

CONCURSO DE DESEÑO DE MARCAPÁXINAS

Un ano máis convocamos a todo o alumnado do centro a participar na elaboración dun marcapáxinas, que nesta ocasión  versará sobre os valores positivos da humanidade, baixo a temática 

MELLORA O TEU MUNDO. 

Deixámosvos no seguinte cartel toda a información coas bases a seguir. ANIMÁDEVOS!!!

ENCONTRO CON PEPE BARRO

 Este mércores, día 16,  contamos coa presenza do creador eumés Pepe Barro, antigo alumno do centro, que mantivo un encontro co alumnado de bacharelato de artes para falar sobre o deseño gráfico. Aínda que a actividade tivo lugar no salón de actos, por mor do aforo, na biblioteca contamos coa súa visita e agasallounos con esta fermosa dedicatoria.

CENTENARIO JOSÉ SARAMAGO

Este mércores, día 16, cumpriranse cen anos do nacemento do escritor luso José Saramago. Dende a biblioteca queremos lembrar a súa figura  amosándovos esta presentación cos libros que tedes dispoñibles na biblioteca.

CHARLA BIOLOXÍA MARIÑA

Continuamos coas actividades do Mes da Ciencia. Nesta ocasión na biblioteca acollimos unha nova charla a cargo de Guilermo García, encargado da Estación de Bioloxía Mariña da Graña, pertencente á USC, para explicar as labores que nela se desenvolven.

CHARLA SOGAMA

Como cada ano, en novembro celébrase o Mes da Ciencia en galego. Dentro das actividades programadas para festexar esta data, este venres, día 11, na biblioteca  tivo lugar unha charla sobre a "separación de residuos", a cargo dun técnico de Sogama, á que asistíu  alumnado de 2º  de bacharelato e do C.S. de Química e Saúde medioambiental.

FESTEXANDO O SAMAÍN

 Á espera das actividades que imos a ter este venres terrorífico, queremos compartir o noso quizz para que disfrutedes co voso alumnado... 

Se queredes ler literatura de terror, podémosvos recomendar obras que garantizan arrepíos, sobresaltos e ollos coma pratos...

PREME NA IMAXE

MOCHILAS VIAXEIRAS E SAMAIN

Este luns, coincidindo co Día das Bibliotecas, emprenderon a súa viaxe, cara ás casas, as mochilas viaxeiras. Aquí podedes ver os tres alumn@s de 1º da ESO que iniciaron a súa andaina.

 Desexamos que desfrutedes delas!

Asemade vos deixamos toda a información das actividades programadas para o Samain e lembrámosvos que tamén podedes visitar, na biblioteca, a mostra que preparamos de lecturas terroríficas en galego.

DÍA DAS BIBLIOTECAS

 

O día 24 de outubro celébrase o Día das Bibliotecas e para a ocasión elaboramos esta presentación na que se amosan diferentes cadros nos que se representan  algunhas bibliotecas. Con isto,  queremos que vos percatedes de que as bibliotecas están presentes nas nosas vidas dende hai séculos. 

Esperamos que vos guste!

VISITA DE SÉCHU SENDE

Este martes, día 18, o alumnado de 2º de bacharelato mantivo un encontro co escritor Séchu Sende que veu a falar do seu libro Made in Galiza, no que trata os aspectos sociolinguísticos da lingua galega, lectura sobre a que os/as rapaces e rapazas están a traballar durante este trimestre.

Dende aquí queremos agradecer ao autor o seu entusiasmo e bo facer.

 

DÍA MUNDIAL DA SAÚDE MENTAL

Co gallo do Día Mundial da Saúde Mental na biblioteca temos preparada unha pequena mostra con lecturas e películas que tratan sobre esta problemática. Agardamos a vosa visita!!!

VISITA Á BIBLIOTECA

 Como xa ven sendo habitual, cada novo curso organizamos unha visita á biblioteca para o alumnado de 1º da ESO na que se lles explica todo o referente a súa organización, funcionamento e actividades. Ao longo da semana pasada, cada un dos tres grupos foron participando nesta actividade da que aquí vos deixamos as imaxes.

Esperamos que esta fora a primeira de moitas visitas!

ANTONIO DE NEBRIJA E JAVIER MARÍAS

 O 5 de xullo cumpríronse 500 anos do pasamento de Antonio de Nebrija, aínda que nesta data estabamos a disfrutar das vacacións de verán, dende a biblioteca non queremos deixar pasar a ocasión de darvos a coñecer a súa figura. Por este motivo elaboramos o cartel que aquí vos amosamos.

Tamén queremos informarvos de que na biblioteca temos unha pequena mostra sobre gran escritor e eterno candidato ao Nobel JAVIER MARÍAS, falecido o pasado domingo día 11.

XA ESTAMOS DE VOLTA

Dende a biblioteca queremos darvos a benvida a este novo curso que empeza. Tanto aos que xa nos coñecedes como aos que estades por primeira vez neste centro esperamos atoparos neste lugar de encontro que representa a biblioteca. Xa estamos a traballar en novas propostas das que esperamos sexades partícipes. BO INICIO DE CURSO!!!

RECOMENDACIÓNS VERÁN

Rematamos un curso máis dispoñéndonos a desfrutar dunhas merecidas vacacións. Para este tempo de lecer que nos agarda, dende a biblioteca temos preparado unha selección de lecturas que este verán poidan ser un bó compañeiro. E se algún de vos ten pensado aproveitar estas vacacións para facer o Camiño de Santiago, propoñémosvos tamén unhas lecturas que teñen como escenario a ruta xacobea.

Día Mundial do Medio ambiente

 O domingo día 5 celebrarase o Día Mundial do Medio ambiente e desde a Biblioteca querémosvos concienciar da importancia que ten o coidado do noso planeta, e, por iso, preparámosvos unha selección de lecturas sobre esta temática.

Tamén vos deixamos este cartel informativo sobre o problema que supón  o consumo de  plástico, que ameaza con contaminar cada recuncho do noso planeta.

Concurso Fotolibro

 Sen demorarnos máis, queremos agradecer a tódolos participantes do concurso convocado polo Día do Libro, as fotos enviadas da súa lectura preferida nun espazo aberto. Parabéns para Emma (alumna da ESO) e a profesora María Loureiro, que foron as gañadoras. 

A todos/as os/as que participáchedes vos agarda na biblioteca un pequeno agasallo doce.

                      

                          Foto Emma                                                         Foto María

ACTIVIDADE: A FRANCOFONÍA

 Hai uns días, o alumnado de francés de 3º ESO visitou a biblioteca para expoñer os seus traballos sobre a Francofonía, dedicado especialmente a un país francófono ou membro da organización. Ao longo deste mes, amosarémosvos algunhas das presentacións feitas pol@s alumn@s.

    

DOMINGO VILLAR

As letras están de loito. Este mércores día 18 faleceu o escritor vigués Domingo Villar, mestre da novela negra e pai literario do inspector Leo Caldas,  aínda que seguirá a vivir entre nós a través das súas obras.

Letras Galegas 2022

 Aproxímase o 17 de maio, Día das Letras Galegas, e para a ocasión a nosa compañeira Elvira Roiz preparou esta magnífica presentación sobre o autor homenaxeado este ano: Florencio Delgado Gurriarán, que destacou pola súa obra poética e a súa defensa dos valores democráticos en tempos adversos.

Preme na imaxe para velo video.

Semana do Libro e outras actividades

Esta última semana de abril, que adicadamos ao Libro, desde a biblioteca preparamos, para o alumnado de 1º da ESO, unha actividade lúdica enfocada a mellorar os seus coñecementos sobre a CDU. Para isto, cada grupo foi dividido á súa vez en grupos de 3/4 alumn@s; o equipo que antes rematou a actividade sen erros foi agasallado cunha libreta.

E tamén nesta última semana acollimos na biblioteca dúas charlas divulgativas,das que aquí vos deixamos foto e información:

"Descubrimento de fármacos", a cargo de Alberto José Coelho

"Vida en Xapón. Proxecto: Microorganismos e metais pesados", a cargo de Ánxela Ares,  investigadora no Okinawa Institute of Science and Technology

  

 

Onde andas agochado, libro?

 

DÍA DO LIBRO 2022

 Un día tan especial coma hoxe non queremos deixar de lembrar que ler activa a imaxinación e mellora o noso pensamento. Así que, de forma especial, animámosvos a buscar ese momento de paz e sumerxirvos na lectura dalgún libro novo ou antigo, deses que xa lemos hai tempo...

Dende a biblioteca, estamos a preparar unhas actividades para esta semana que, pronto, vos daremos a coñecer...

Charla sobre o Descubrimento de fármacos

 O venres, 8 de abril, dimos por rematadas as actividades deste segundo trimestre  coa charla “Descubrimento de fármacos”, dirixida ao alumnado de 1º de Bacharelato de Bioloxía. A charla encádrase dentro do Programa “A Ponte” da Universidade de Santiago de Compostela e  foi impartida polo profesor  Alberto José Coelho. 

Que teñades unhas boas e felices vacacións!!! e vémonos á volta.

PLATAFORMA DE LECTURA DIXITAL

Temos unha excelente nova!

 Incorporamos ao noso blog na marxe dereita un acceso á nova plataforma de préstamos dixitais que ofrece a Consellería aos centros integrados no Plambe a tódolos usuarios/as da biblioteca. 

Para poder disfrutar dela, podedes recoller o voso usuario e a vosa clave na biblioteca. 

Para calquera aclaración, estaremos encantad@s de atendervos...

Charla "Lola e o mar"

 Rematamos o mes de marzo adicado á muller cunha charla que ademáis conecta coa nosa temática "Lugares e xentes": O alumnado de 4º da ESO tivo un encontro coa investigadora do Instituto Español de Oceanografía Lola Garabana, quen nos falou da súa traxectoria profesional dende as súas viaxes como tripulante en barcos pesqueiros ata a súa labor actual como investigadora. 

Dámoslle as grazas por compartir as súas experiencias e por ser un exemplo de empoderamento feminino. 

Día da Poesía e Aniversario de Miguel Hernández

O luns 21 celebrouse o Día Mundial da Paz, establecido pola Unesco en París en 1999, coa finalidade de apoiar a diversidade lingüística e fomentar a visibilización daquelas linguas que se atopan ameazadas. E, por outra banda, o luns 28 cumpriranse 80 anos da morte de Miguel Hernández, poeta que soubo reflectir a angustia que lle producían os efectos devastadores da guerra. Por este motivo, decidimos aunar estas dúas conmemoracións destacando a poesía deste autor que segue vixente nestes momentos convulsos para a humanidade.

 

Charla Sistema universitario anglosaxón

 O pasado día 7, estivo na nosa biblioteca Kerry McKenitt, xefa de estudos da EOI de Ferrol, para explicar ao alumnado de 2º de bacharelato, que cursa a materia optativa de Reforzo de inglés, o funcionamento do sistema universitario nos países anglosaxóns. Grazas pola súa cercanía cos rapaces/zas e bo rato que nos fixo pasar.

"Habelas, hailas" (Lecturas 8M)

Aínda que a miúdo atoparon dificultades para formarse, difundir e comercializar o seu traballo, así como para obter recoñecemento, sí houbo mulleres que pintaron, esculpiron, compuxeron... Mulleres artistas cuxa existencia viuse silenciada e borrada dos libros.

Por iso, co gallo do Día Internacional da Muller, presentámosvos unha seleción de materiais nos que as protagonistas son mulleres de onte e de hoxe e de diferentes disciplinas artísticas.

 

ENCONTRO CON AURORA MARCO

Para festexar o Día Internacional da Muller, este luns día 7, contamos na nosa biblioteca con Aurora Marco,  autora de numerosas publicacións de lingua e literatura, de mulleres e xénero e de memoria histórica. Nesta ocasión mantivo un encontro co alumnado de 4º da ESO para falar do seu libro Irmandiñas, obra na que se dá visibilidade e voz a todas as mulleres vinculadas ás "Irmandades da Fala".

Visita Antón Cortizas

 Este xoves 24, visitou a nosa bilioteca o escritor ferrolán Antón Cortizas para reunirse co alumnado de 1º da ESO, que está a ler o seu libro Leonel. Ademáis de falar e atender ás preguntas do alumnado sobre esta lectura, ofreceunos unha clase práctica de papiroflexia que foi moi desfrutada por tódolos/as rapaces/as. Dende aquí queremos agradecerlle a súa entrega e esperamos contar con él en novas ocasións.

#Desafíogalego, Séchu Sende e O Rabelo

O pasado xoves, 17 de febreiro, púxose en marcha #DesafíoGalego,  iniciativa creada como actividade polo EDLG  para o Programa Innovative Language in a Bilingual Country, dentro do Proxecto Erasmus KA2. Trátase de visibilizar e proxectar o galego  e a cultura de noso en todos os ámbitos sociais (escolar, familiar, virtual...), e para isto contaremos coa participación  do alumnado de 1º e 2º de bacharelato que estea concienciado na importancia da lingua propia de Galicia e queira implicarse na súa promoción. Este proxecto prolongarase ó longo dunha semana, finalizando o  23 de febreiro, Día de Rosalía, coa actuación de O Rabelo.

Para dar comezo a esta actividade contamos no centro coa grata presenza do autor Séchu Sende, quen ademáis tivo un encontro co alumnado de bacharelato para falarlles do seu libro Made in Galiza. Aínda que o acto tivo lugar no salón de actos, por mor do aforo, Séchu visitou a nosa biblioteca deixándonos esta fermosa dedicatoria.

SAN VALENTÍN - 14F

 Neste día tan sinalado para os namorad@s, queremos compartir esta presentación, feita pola nosa compañeira e colaboradora Elvira, para concienciar aos mais xóvenes sobre os  riscos de mitificar o amor romántico.

Científicas no cine

 Dende o ano 2015,  cada 11 de febreiro, celébrase o Día Internacional da Muller e a Nena na ciencia coa finalidade de paliar a invisibilidade do papel das mulleres neste ámbito e fomentar prácticas encamiñadas a acadar a igualdade de xénero no ámbito científico.

 Para a ocasión dende a biblioteca presentámosche esta pequena colleita de películas que teñen como protagonistas a mulleres científicas.