30 ene 2012

Día da paz

Hoxe, día 30 de xaneiro, data do aniversario da morte de Mahatma Gandhi (1869-1948), celébrase o "Día escolar da non violencia e da Paz" (DENIP) e nesta data o proxecto "Coñecernos para querernos" que estamos a levar a cabo cos rapaces e rapazas dos campamentos de refuxiados sahararuis en Tinduf fainos sentir, se cabe, máis preto de todos aqueles que como eles están a ser vítimas desas guerras esquecidas, eses conflitos ignorados pola comunidade internacional.

Cando eliximos este título para o noso proxecto, fixémolo convencidos do que ese "lema" significaba, fixémolo con plena conciencia do noso obxectivo principal, coñecer a quen está a loitar polos seus dereitos e, na medida das nosas posibilidades, loitar para que eses dereitos algún día, non moi lonxano, sexan recoñecidos e ese exilio ao que levan sometidos 35 anos cese dunha vez e consigan alcanzar un acordo definitivo de paz que permita a libre determinación do pobo saharaui.

E para que nos vaiamos coñecendo velaí tedes "101 imaxes, 101 abrazos para coñecernos, para aprender a querernos" chegados dende Smara para tod@s nós, para tod@s vós.


Hoxe, día da Non Violencia e a Paz, as bibliotecas escolares do Plambe-Ferrolterra implicados, a través do Bubisher, neste fermoso proxecto "Coñecernos para querernos" queremos berrar alto e forte "Deámoslle unha oportunidade á Paz" "Give peace a chance!"

Give peace a chance - John Lennon

(Artigo publicado en común polas BIBES de Ferrolterra)

12 ene 2012

NOTICIAS DO LABIRINTO GREGO.

Dicía Dashiell Hammett que o éxito da novela negra baseábase en que ademais da trama propiamente dita ofrecía unha crónica do estado actual da sociedade que nos rodea. Dita argumentación podería aplicárselle directamente a "Con el auga al cuello" de Pietros Markaris. Esta novela nárranos, por medio do seu protagonista o comisario Kostas Jaritos, con toda crueza as causas e consecuencias da crise grega e as reaccións dos distintos colectivos afectados por ela ( policías, funcionarios, médicos, banqueiros, comerciantes etc.). Neste contexto de iracundas manifestacións, reaccións desesperadas causadas pola asfixia económica e os recortes sociais discorre o argumento da novela, unha historia de perdedores narrada por un personaxe politicamente incorrecto e aparentemente descoidado pero ao que a súa mente lle funciona á perfección. " Con el auga al cuello " é algo máis que unha novela negra, ofrécenos unha historia verosímil e de triste actualidade . A Markaris preocúpalle a situación do seu país e por iso o cronista imponse ao novelista e de forma descritiva case sen concesións aos adornos literarios axúdanos a comprender as reaccións dos seus compatriotas, as súas posturas vitais, as súas inquietudes. Os diálogos entre os personaxes non teñen desperdicio e entre chiscadelas continuas de solidariedade cara ao noso país (os feitos ocorren durante o campionato do mundo de fútbol) debúllanos unha amarga historia que ao final nos fai reflexionar o plausible que resulta nun escenario como o que nos describe. Non é unha gran obra nin o pretende, é simplemente un libro entretido, pero o autor é capaz de transmitirnos a súa preocupación polo estado de frustración e desesperación no que está sumido o seu país e no que a ausencia de saídas de futuro parece quedar resumido nun horizonte de negros nuboeiros que enmarcan un xigantesco signo de interrogación.